Inauguran en Lavadores un cruceiro de cinco metros feito pola Escola de Canteiros da Deputación

O alcalde de Vigo, Abel Caballero, e a presidenta da Deputación de Pontevedra, Carmela Silva, asistiron este mércores á inauguración do novo cruceiro que preside a subida á Igrexa de San Paio de Lavadores e que foi elaborado expresamente para este emprazamento pola Escola de Cantería de Pontevedra. A peza está culminada cunha imaxe "moderna" dun Cristo, pero inclúe tamén no fuste unha representación do santo Paio. O cruceiro, cunha altura de cinco metros, é unha “elaboración coral” do alumnado e profesorado do centro de formación da Deputación e quedou instalado á altura do número 170 da rúa Cabalaria, a pouco máis de 50 metros do templo, un edificio relixioso que data dos anos 70.

No acto inaugural, Carmela Silva lembrou que tanto Galicia como a provincia de Pontevedra e Vigo son “terra de cruceiros e de canteiros e canteiras. Somos un pobo que traballa moi ben a pedra de forma secular, de feito o noso alumnado traballou por todo o mundo”. A presidenta provincial puxo en valor o papel da Escola de Cantería, un centro “do que sentimos orgullo”, e deixou claro que a Deputación quere que “continúe habendo obra deses canteiros e canteiras e que siga quedando en cada un dos recunchos da nosa provincia, moi particularmente en Vigo onde estamos a facer moitas obras a través da Escola”. Carmela Silva resaltou a "ledicia" que supón inaugurar un cruceiro e atoparse rodeada de veciñas e veciños e a “ilusión por facer cousas que satisfagan á veciñanza” á que agradeceu a súa presenza no acto.

Másnoticias

La acusada de llevarse a su hijo de Vigo sin avisar afirma que no impedía las visitas al padre

23/10/2024

Así es el novedoso plan de ocio que se oculta tras los carteles que han aparecido en Vigo

23/10/2024

Pola súa banda, Abel Caballero definiu aos cruceiros como “lugares de encontro, lugares para identificar os territorios, os espazos e as persoas”. O alcalde de Vigo asegurou que con esta inauguración “vanse a marcar os tempos a partir de agora” posto que se falará da igrexa pero tamén do cruceiro. Aproveitou a ocasión para felicitar tanto á Deputación como ás persoas autoras da obra por realizar unha “combinación fantástica” entre a arte modernista e o románico tradicional. Na súa intervención Abel Caballero tamén resaltou o tamaño do cruceiro, “unha escultura monumental pero chea de sentimentos e de sensacións”.

O cruceiro ten un peso que supera as catro toneladas e foi elaborado expresamente para este emprazamento, cunha base formada por dúas pezas en cuña para adaptarse ao terreo. Trátase do primeiro cruceiro na contorna desta igrexa nunha zona na que tamén hai varios petos de ánimas, obra do escultor Camilo Nogueira e datados a principios do século XX.