Outubro será un inesperado "mes medieval" coa celebración da festa de Moaña Antiqua

Novo adiamento en Moaña para garantir a celebración dos eventos culturais máis destacados do calendario. Tras pospoñerse o Festival Intercéltico, chega agora a quenda do adiamento de Moaña Antiqua, a festa medieval de San Martiño. O seu comité organizador vén de acordar adiar a súa quinta edición a primeira fin de semana de outubro.

Nunha reunión celebrada telemáticamente entre as entidades e asociacións organizadoras, acordouse aprazar a súa celebración para “intentar preservala no presente ano”. A organización explica que “tamén obedece a aposta decidida por manter os compromisos adquiridos coas persoas creadoras, artistas, propietarias de postos e persoal técnico implicadas na loxística e produción de Moaña AntiQua, que tanto están a sufrir as consecuencias desta crise ante a cancelación masiva de actuacións e doutros eventos”.

Másnoticias

Un local de Moaña protagoniza el último zasca viral: "Absoluta falta de empatía"

23/10/2024

La RAG premia a un colegio de Cangas por un trabajo sobre Luisa Villalta

22/10/2024

Este evento xa consolidado que busca a posta en valor o patrimonio histórico-cultural e a súa difusión dende unha perspectiva lúdica e festiva celebrarase, se as autoridades sanitarias o permiten, do 2 ao 4 de outubro de 2020.

A cita -prevista inicialmente para xuño- mestura un mercado medieval con xustas, obradoiros, exposicións, animación de rúa e actuacións na histórica contorna da igrexa de San Martiño en Moaña. A cita está organizada pola Asociación Cultural Moaña Antiqua e o Concello de Moaña en colaboración con A.V. San Martiño de Moaña, Asociación de Mulleres de Moaña, ADOC Cabaleiros de Moaña, A.C. Moañesa de Música e Danza e a Comunidade de Montes de Moaña.