Os “días de Mar” de Moaña chegan cun festival no solpor con vistas á ría de Vigo

Concerto celebrado no 2017 no Monte do Con // Asociación Veciñal "O Pegho"

A programación de verán en Moaña durante o mes de agosto, que se agrupa nos denominados “Días de Mar” estará este 2019 protagonizada pola música en directo. Como gran novidade, chega a primeira edición dun “minifestival” que levará o nome “Do sol e a lúa” e que permitirá desfrutar dunhas vistas privilexiadas á ría de Vigo durante o solpor. A cita, que se celebrará este sábado, 3 de agosto, dende as 21:00 horas, contará co recital poético musical de Ana Blanco & Paulino, o pop xuvenil de Maria Faltri & Banda e o rock and roll de Balea’s. O evento, organizado pola asociación “O Pegho” en colaboración co Concello, pretende dotar de actividade cultural ao parque situado no Monte do Con (rúa Albariños), que conta con miradoiros privilexiados.

Outra das citas que pretende ser multitudinaria será o concerto do grupo De Vacas, que se celebrará na noite do sábado 10 de agosto no Palco da Música no paseo marítimo. O grupo, integrado polas voces de Inés Salvado, Faia Díaz e Paula Romero, e a guitarra de Guillerme Fernández, ofrecerá un show divertido no que se versionan cancións que van dende Beyoncé a Rosalía. Un día antes, o venres 9 de agosto, outra das citas a non perder será o concerto do Comboio Novo lideradro polo mestre gaiteiro Xavier Blanco.

Másnoticias

Un local de Moaña protagoniza el último zasca viral: "Absoluta falta de empatía"

23/10/2024

La RAG premia a un colegio de Cangas por un trabajo sobre Luisa Villalta

22/10/2024

Entre as novidades, estará tamén o Festival RAP’N Moaña que retoma a súa segunda edición no Parque da Xunqueira o sábado, 17 de agosto. Aínda no apartado musical, repite o Festival de Jazz, que celebra a súa terceira edición entre o 13 e o 14 de agosto no Parque da Xunqueira.

Tapeo e citas gastronómicas

Ademais de música, a programación de agosto conta tamén cunha importante presenza gastronómica coa Festa do Mexillón, que celebra a súa vixésimo quinta edición no Patio do Colexio de Reibón este domingo, 4 de agosto. En Meira, a Carballeira de Bronlle acollerá a súa festa popular con pulpeiro, postos gastronómicos solidarios e diversas actividades infantís o 15 de agosto. Por último, como novidade, os xardíns do Concello acollerán a primeira edición da Feira do Mel de Moaña o domingo, 18 de agosto.

Tamén volverá o programa de tapeo con petiscos a 2,50 euros en oito establecementos do municipio. O histórico roteiro de tapas, volve un ano máis para combinar creacións gastronómicas baseadas nos produtos do mar con música en directo de diferentes grupos emerxentes locais. Celebrarase o venres 2 de agosto en Vansy, o mércores 7 en Burguer Piscis, o xoves 8 en La Cibeles, o martes 13 en Var con Uve, o mércores 14 en A Carriola, o venres 16 en Cervexería Muxicas, o martes 20 en Tapería Bajamar, o mércores 21 na Terraza do Burguer Piscis e o xoves 22 en La Hacienda.

Por último, con respecto a programación anunciada inicialmente, modifícase a data da exposición “Vento nas velas” que se desenvolverá entre o 3 e o 31 de agosto no Paseo Marítimo namentres que non será posible realizar a botadura da dorna Meiga prevista para o sábado, 3 de agosto.