José Fervenza (PP): "Temos que encauzar Moaña cara ó turismo durante todo o ano"

En poucas palabras, que motivos lle das aos veciños e veciñas de Moaña para que elixan a túa papeleta o día das eleccións?

Moaña vén dunha parálise importante nos últimos catro anos e dun abandono total. O que pedimos e volver a darlle ilusión á xente e aos 39 barrios de Moaña para poder recuperalos e darlle o que se merecen.

Másnoticias

Un local de Moaña protagoniza el último zasca viral: "Absoluta falta de empatía"

23/10/2024

La RAG premia a un colegio de Cangas por un trabajo sobre Luisa Villalta

22/10/2024

Como imaxinas a Moaña de dentro de catro anos se o PP volve á alcaldía?

Co proxecto que temos queremos encauzar a Moaña cara o turismo para que o comercio e hostalería poidan ter unha oportunidade. Temos case 20.000 habitantes e entendemos que o potencial é o turismo. Estamos a 15 minutos de Vigo e necesitamos poñer en valor o que temos: praias, turismo, mar e montaña.

Cales son os retos culturais de Moaña?

Somos berce de grandes persoas que puxeron a Moaña no mapa. Queremos recuperar as festas tradicionais e intentar crear máis eventos culturais. Moaña necesita algo moi importante: temos corais e unha gran banda de música e é lamentable que non haxa onde poidan actuar. Non temos auditorio. Foron catro anos perdidos.

Construirá o PP un auditorio municipal en caso de chegar á alcaldía?

Imos a comezar o auditorio municipal. Na lexislatura pasada había un compromiso da Deputación de Pontevedra de 1,5 millóns para iniciar as obras. Había que urbanizar e chegar a un acordo cos propietarios. Esta lexislatura é o momento de inicialo. Non vou a enganar a ninguén e dicir que estará rematado, pero si estarán iniciadas as obras.

O actual goberno critica a situación económica de endebedamento que se atopou en 2015. Que opinión tes ao respecto?

Moaña non tiña que deber un duro e debe seis millóns de euros ou sete ou oito. Non nos fiamos das contas. Hai que facer unha auditoría. Non é verdade o que din. A débeda a baixan os impostos dos veciños. Cando unha casa pagaba 90 euros de IBI no 2009 agora paga case 300 euros. Ademais, tres persoas teñen dedicación exclusiva o que supón un gasto de máis de medio millón de euros. Non están facendo nada por baixar a débeda. Cando o PP chegou no 2011 ao goberno en minoría a débeda era de 20 millóns e o remanente negativo era de 8 millóns, o orzamento dese momento. Cando deixei o Concello sendo alcalde era positivo. Foi o desastre dos bipartitos e tripartitos. Cando chegamos debían máis de tres millóns de euros a Sogama e Mancomunidade.

Como valoras esta lexislatura?

Ineficacia total. Non se colocou nin unha sola baldosa. As estradas provinciais están abandonadas. Agora están cos venres de chapapote en plena campaña electoral intentando enganar á xente, pero a xente é máis intelixente que iso.

Que papel debe xogar Moaña no campo turístico?

O turismo non ten que ser 15 días no verán. Ten que estar en marcha todo o ano porque o pequeno comercio e hostalería teñen que vivir todo o ano. Temos que reinventarnos e intentar que a xente de Vigo se acerque a Moaña e que todos os meses do ano haxa eventos culturais. Precisamos tamén mellorar as infraestruturas.

Cres que poderás recuperar á alcaldía?

A teñen que recuperar os veciños. Eu non teño nada que recuperar. Estivemos en contacto directo cos veciños e os últimos venres de mes durante os últimos catro ano fixemos asembleas abertas. Se os veciños entenden que o PP estivo á altura nos darán a súa confianza, se entenden que non fixemos un traballo adecuado e que o bipartito resolveu os seus problemas teñen varias opcións. O PP foi sempre a forza máis votada.

Cal sería un bo resultado?

O bo resultado é o que decidan os veciños. Toca esperar o que digan as urnas e acatar o resultado. Os veciños teñen a última palabra.

Con quen negociaría o PP para poder chegar a un pacto de goberno?

O PP sempre estivo aberto a negociar con calquera forza política, menos co BNG.

Manterás eventos como Morrasound ou Moaña Antiqua?

Moaña Antiqua a puxo en marcha xa o goberno do Partido Popular, é unha iniciativa nosa. Todos os eventos que se fagan, veñan de onde veña, como o Morrasound que é moi interesante, parécenme moi importantes para Moaña.

Que se xoga Moaña o 26 de maio?

Moaña xógase ter un goberno cercano onde haberá uns concelleiros a disposición dos veciños. Que cada vez que vaias ao Concello non te dean coas portas nas narices.

Un gran proxecto para Moaña.

O presentaremos nuns días.

En relación ao centro de saúde, castiga a Xunta a Moaña porque a alcaldía non é do PP?

Cada un que faga a súa valoración. Quen está castigando a Moaña é o BNG e o PSdeG. A día de hoxe non se puxo nin un só metro cadrado a disposición do Sergas. Non se firmou ningún convenio. Pasaron catro anos, non catro meses nin catro días. Cada un que valore. Creo que o bipartito non lle quere dar a satisfacción ao señor Alberto Núñez Feijóo de poder dotar a Moaña desa gran infraestrutura. O goberno bipartito está castigando a toda Moaña. Se a Xunta castigara aos moañeses non estaría onde estou.

Nas últimas semanas hai xente reclamando unha rúa para Iago Aspas. Consideras que é prioritario?

Penso que o merece. O merece. Xa se ten falado e moitos veciños nos teñen trasladado dalgunha maneira facelo fillo adoptivo e darlle unha rúa.

PP MOAÑA