El Concello asegura que "no pone en duda" la existencia de los cascotes de Balaídos

Vigo, 11 de marzo de 2019.- Logo da publicación hoxe nos medios de comunicación dunha fotografía difundida nas redes sociais onte domingo sobre a bancada de Marcador, este luns ordenamos a realización dunha inspección visual da citada bancada e da súa cubrición.

Un total de sete profesionais inspeccionaron Marcador e percorreron todos os corredores entre os asentos da bancada, co obxecto de determinar a posible orixe da imaxe aparecida nas redes sociais. O equipo técnico estivo formado por:

• dous xefes de obra e o encargado das actuacións de reparación levadas a cabo en Marcador entre decembro do pasado ano e xaneiro de 2019
• un enxeñeiro de estruturas pertencente ao equipo redactor do informe técnico sobre o estado das bancadas de Marcador e Gol de decembro de 2018
• un inspector e dous técnicos municipais.

Rematada a inspección deste luns, e coa cautela pertinente ao dispoñer só dunha fotografía difundida en redes sociais, os responsables técnicos conclúen o seguinte:

• inicialmente non se atopa correlación entre o material da imaxe publicada e os existentes na parte estrutural da bancada de Marcador
• o material da nomeada imaxe non se corresponde co empregado nas reparacións efectuadas recentemente (decembro de 2018 e xaneiro de 2019)
• na inspección visual non se atoparon patoloxías estruturais que poidan dar lugar a ese resto que aparece na fotografía publicada en redes sociais

De todos formas, e como xa vimos facendo periodicamente, desde o Concello continuaremos nos próximos días coa avaliación e revisión das estruturas para garantir a seguridade de todos os espectadores.

Vigo, 13 de marzo de 2019.- Despois da publicación nos medios de comunicación de partes do comunicado emitido polo Concello o pasado luns, ao respecto da incidencia acaecida na grada de Marcador durante o partido do pasado domingo en Balaídos, e ante as interpretacións levadas a cabo sobre este, queremos aclarar:

• En ningún momento o Concello de Vigo pon en dúbida a existencia dos citados restos.
• No comunicado indícase de forma clara que, inicialmente, tras esta primeira visita, os técnicos non atoparon correlación entre o morteiro amosado e o material da parte estrutural da grada de Marcador. Isto quere dicir eses restos mostrados non forman parte do soporte estrutural da grada (principalmente conformada con formigón e aceiro), senón que asemellan ser morteiro ou algún material similar cunha función complementaria á estrutural, como se indica no citado comunicado.
• Tamén se recolle no citado documento que nesa inspección visual non se atoparon patoloxías estruturais, polo que o desprendemento non está asociado á estabilidade estrutural da grada de Marcador.
• Ademais, o comunicado recolle que nos próximos días vaise continuar coa avaliación e a revisión da grada. Esta inspección complementaria, que anunciabamos o luns no comunicado, está a realizarse hoxe mércores co obxectivo de rematar de concretar a causa do desprendemento e garantir a seguridade de todos os espectadores.

O Concello de Vigo garante sempre a seguridade e non pon en dúbida a versión de ningún afeccionado. Tanto é así que, ao día seguinte de ver as fotos, os técnicos municipais desprazáronse ao estadio para estudar as posibles causas dos desprendementos.