Tomiño programa unha trintena de actividades de ocio e deporte até maio

O Concello de Tomiño organizará até o mes de maio unha trintena de actividades en torno á música, os deportes ou á formación activa da mocidade. O mes de marzo, que arrancou coa inauguración no Mercado de Tomiño da exposición ‘Lugares inesperados’ e coa obra de teatro ‘Té con Kant’, de Teatro Inversa, continuará con tres cursos dirixidos á mocidade, de Francés Básico, de Radio e de Poesía e Rap.
Ao abeiro deste Mes da Muller, marzo acollerá ademais outras tres obras de teatro no que as mulleres son as claras protagonistas. O público infantil poderá desfrutar con ‘Rosa Caramelo e outras historias’, de Talía Teatro, o 18 de marzo na Casa da Cultura (18.00 h), e con ‘A maleta da avoa’, de Raquel Queizás, o 25 de marzo no Mercado de Tomiño (18.00 h), mentres que para o público adulto representarase ‘Matrioskas’, de Charlatana, o vindeiro 24 de marzo no Mercado de Tomiño (18.00 h).

Para abril hai outras sete actividades programadas. Xunto con un curso de repostería creativa, terá lugar tamén a Gala do Deporte (14 de abril, no auditorio de Goián), na que se premiarán ás e aos deportistas tomiñeses máis destacados neste último ano, e o Desafío Terras de Turonio, unha proba de BTT de longa distancia que terá lugar o 22 de abril.

Másnoticias

Tui ofrece un terrorífico paseo nocturno por sus calles por el Samaín

23/10/2024

El tomiñés Aitor Martínez aspira a convertirse en el mejor artesano de España

23/10/2024

O 9 de abril chegará a Tomiño unha nova edición de Reptigalia, con exposicións, obradoiros e conferencias sobre insectos, réptiles, anfibios e artrópodos, e se representarán outras tres obras de teatro: ‘A nena que quería navegar’, de Redrum Teatro (1 de abril), dirixida a público infantil; ‘Na butaca’, de ButacaZero, para público adulto (7 de abril); e ‘Sen remite’, de Jean Philippe Kikolas, circo, teatro e humor para toda a familia (29 de abril).

En maio as Letras Galegas terán importante protagonismo, con actividades lúdicas e educativas pola vila o propio día 17, con obradoiros e Feira do Libro na praza do Seixo, música e o espectáculo ‘Bicos de papel’, de Talía Teatro, na Casa da Cultura. Será tamén o mes do curso de xaponés e de tai-chi chuan, dun obradoiro de canto ‘Cantares do Brueiro’ e con tres concertos: ‘A gramola gominola’, de Kandengue Arts o 5 de maio para público infantil; a actuación do coro galego Cantares de Brión, o 12 de maio no auditorio de Goián; e o concerto de ‘De outra margem’, o grupo musical formado por profesorado de primaria e secundaria que realizará unha actuación en colaboración ao alumnado e ex alumnado do IES Antón Alonso Ríos e membros da Agrupación Musical de Goián (19 de maio).

Maio será tamén o mes das Barferencias, unha iniciativa a través da que se leva as conferencias ao Mercado de Tomiño para falar cada sábado do mes de varias iniciativas emprendedoras relacionadas co rural: CdM Couso, innovación no agroalimentario, a minaría e os montes e o asociacionismo e a educación ambiental con A Jalleira.

Un programa “transversal e integrado”

Dende o Concello de Tomiño definen a programación desta primavera como “transversal e integrador”, dando acollida as citas de cultura, deporte e voluntariado, así como as dirixidas á mocidade. Ademais, por vez primeira Tomiño edita unha axenda en papel que aglutina todas as actividades realizadas no municipio nun só programa para o vindeiro trimestre co obxectivo de “facilitar a difusión e traballar dun xeito planificado para conseguir que toda as actividades que levemos a cabo sexan un éxito”, como asegura a alcaldesa de Tomiño, Sandra González.