Un outono de visitas guiadas de balde para percorrer Moaña do mar á fraga

As visitas guiadas de balde de Moaña regresan de novo co outono. O programa municipal de "Descubre Moaña", posto en marcha pola concellería de Promoción Económica e Turismo que dirixe Coral Ríos, continúa na súa aposta de diversificar as accións máis alá do verán co obxectivo de desestacionalizar o turismo e achegar visitantes á vila ao longo de todo o ano.  Desta vez as visitas guiadas comezarán o domingo 5 de setembro e se repetirán todas as fins de semana até o 28 de novembro.

En total, Moaña ofertará 14 rutas guiadas que se celebrarán os domingos ou os sábados, en función de cada semana, e serán todas de mañá, co inicio programado ás 10:30 horas. As visitas serán totalmente gratuítas e están adaptadas aos aforos e normativa anticovid para garantir a distancia de seguridade entre os asistentes.  Para poder anotarse é preciso enviar unha mensaxe de WhatsApp ao teléfono 611 080 853 indicando o número de participantes e a ruta na que se desexa participar.

Másnoticias

Un local de Moaña protagoniza el último zasca viral: "Absoluta falta de empatía"

23/10/2024

La RAG premia a un colegio de Cangas por un trabajo sobre Luisa Villalta

22/10/2024

O Concello manterá algunas das rutas máis exitosas de edicións anteriores do programa de verán, como aquela que visita os escenarios do libro "O último barco" de Domingo Villar no seu paso polo municipio do Morrazo. Á vez, tamén incorporan de novo as intermareais de Tirán, que quedaran fóra da programación de verán.

Canteiras do Litoral de Moaña

Ao longo do percorrido os asistentes descubrirán a historia que agochan as antigas canteiras do litoral de Moaña e que foron a orixe do crecemento económico e social da vila. Co paso do tempo e o desmantelamento das canteiras, eses novos espazos serviron de ubicación para novas actividades empresariais relacionadas co mar, como no caso do estaleiro ASCON ou de Conservas A Guía.

Datas: domingo 5 de setembro e domingo 24 de outubro | 10:30 horas

Sendeiro da Fraga

Este percorrido de catro quilómetros, que arranca na desembocadura do río no areal da Xunqueira, continuará para dar a coñecer a importancia dos ríos, do seu ecosistema e do uso dos muíños. De feito, este sendeiro conta con até unha trintena de muíños que noutra época eran de vital importancia na agricultura do Morrazo.

Datas: Domingo 12 de setembro e sábado 9 de outubro | 10:30 horas

Moaña Mariñeira

Ao longo deste percorrido polo litoral entre o Porto de Moaña e o Porto de Meira os asistentes coñecerán detalles dos inicios da pesca tradicional, a historia do Pósito de Moaña e a figura do seu impulsor ou algúns dos naufraxios máis importantes que afectaron ás familias de Moaña.

Datas: domingo 19 de setembro e domingo 14 de novembro | 10:30 horas

Ruta literaria “O último barco”

O turismo literario ocupa un papel fundamental nesta nova proposta de “Descubre Moaña”. Non é para menos. “O último barco”, o terceiro libro de Domingo Villar, é un éxito a nivel galego e nacional. Xente de tódalas partes ten curiosidade por visitar os escenarios da última aventura de Leo Caldas. Neste caso, os guías de A Illa dos Ratos levarán aos participantes por lugares fundamentais na novela como a Igrexa de San Xoán de Tirán, o Mirador da Moma ou o Marusía, o restaurante que namorou a Leo Caldas.

Datas: Domingo 26 de setembro, domingo 17 de outubro e domingo 21 de novembro | 10:30 horas

Sendeiro de Rialdarca

Os amantes da natureza teñen nesta ruta unha nova forma de coñecer esa Moaña “verde”. O sendeiro Rialdarca non será soamente un encontro coa naturaeza, senón que tamén haberá protagonismo para o patrimonio etnográfico que contén este emprazamento, un lugar no que os membros de A Illa dos Ratos explicarán historias sobre esta senda que conectaba Moaña fai bastantes anos. Durante o percorrido, que terá unha duración aproximada de 90 minutos, explicarase, por exemplo, a utilización dos muíños, infraestruturas que forman parte deste tesouro medioambiental da vila morracense

Datas: Domingo 3 de outubro | 10:30 horas

San Martiño

A visita apenas nos obrigará a camiñar, xa que soamente percorreremos a contorna da igrexa. Os asistentes descubrirán a historia das casas e como apareceron aí e outros elementos propios dun dos barrios senlleiros do municipio.

Datas: domingo 31 de outubro | 10:30 horas

Intermareal de Tirán

Esta visita guiada, moi interactiva, está especialmente enfocada para toda a familia permitíndonos realizar un percorrido polas praias para coñecer a súa biodiversidade aproveitando para recoñecer bivalvos, crustáceos ou estrelas de mar.

Datas: sábado 6 e domingo 7 de novembro | 10:30 horas

Mulleres da Historia de Moaña

Neste roteiro ponse en valor o papel da muller dentro do desenvolvemento da sociedade e a vila de Moaña. Historias que paga a pena coñecer sobre figuras importantes con nome propio como Lela Soage, Elisa de la Peña, Lola Diz ou Concepción Arenal, fortemente vencellada ao municipio, que se mesturarán con alusións a colectivos máis anónimos como as peixeiras, as mariscadoras ou as carreiras.

Datas: domingo 28 de novembro | 10:30 horas